Deteñen cinco persoas e investigan cinco máis que vinculan con planadoras aparecidas en Ribeira en 2023

Axentes do GRECO Galicia e efectivos do Servizo de Vixilancia Aduaneira (SVA) desenvolveron nas últimas horas un operativo policial contra o narcotráfico que se saldou cun total de 10 persoas implicadas, cinco detidos e cinco investigados. 

Entre supostos involucrados, destacan dous relacionados con Sito Miñanco en anteriores operacións: un xa foi detido en Bilbao, e o outro aínda está sen localizar. A investigación está dirixida polo Xulgado de Instrución número 5 de Vigo, que declarou as dilixencias secretas.

Segundo informaron a Europa Press fontes coñecedoras da investigación, este operativo está relacionado coa investigación pola aparición de dúas lanchas planadoras na costa de Ribeira, nas praias de Espiñeiredo e O Rial, en febreiro de 2023.

Na xornada deste martes producíronse actuacións policiais nas localidades de Noia, Vilanova de Arousa, A Estrada, Bertamiráns e un rexistro nunha propiedade de Portonovo.

Ademais das persoas arrestadas e as investigadas, as forzas policiais interviron varios moldes para a construción de planadoras semirríxidas, así como un camión listo para transportar as embarcacións e que estaba nunha leira privada de Vilanova de Arousa.

As narcolanchas atopadas en Ribeira transportaban un importante alixo de cocaína que fora descargado de madrugada. Eran embarcacións de grandes dimensións, duns doce metros de eslora e con dous ou tres motores de trescentos cabalos cada un.

Apareceron baleiras de carga, con combustible nos depósitos. Os investigadores sospeitan que a descarga de droga, un alixo de cocaína, realizárase nun punto distinto a onde abandonaron as embarcacións.