Detida unha persoa en Barcelona en avanzado estado de radicalización xihadista
Segundo a Policía, o arrestado estaba interesado en facilitar o envío de combatentes a zonas de conflito
O xuíz da Audiencia Nacional que instrúe o caso enviouno á prisión
A Policía Nacional detivo en Barcelona unha persoa en avanzado estado de radicalización xihadista (Axencia EFE)
A Policía Nacional detivo en Barcelona unha persoa, que xa ingresou en prisión preventiva, acusada de estar nun avanzado estado de radicalización xihadista.
Segundo informou este venres a Policía Nacional, o sospeitoso foi detido o pasado luns en Barcelona e ingresou este xoves en prisión por orde do Xulgado Central de Instrución Número 6 da Audiencia Nacional.
O arrestado accedía supostamente a arquivos dixitais violentos de plataformas afíns á organización terrorista DAESH, onde consumía publicacións que facilitan o autoadoutrinamento e a captación de individuos para grupos terroristas.
Segundo a Policía, tiña interese en facilitar o envío de combatentes a zonas de conflito.
Na operación, desenvolvida o pasado luns, a Policía Nacional practicou dous rexistros na provincia de Barcelona, onde interveu unha gran cantidade de material electrónico e documentación que están a analizar os investigadores. Tamén localizaron mercadoría presuntamente falsificada, que segundo a policía podería servir para financiar as súas actividades.
Na operación policial, dirixida pola Audiencia Nacional, participaron axentes da Comisaría Xeral de Información, a Brigada Provincial de Información de Barcelona e o Centro Nacional de Intelixencia (CNI).
