Detidas catro persoas tras unha espectacular persecución polas rúas de Santiago

A persecución policial comezou na rúa Touro, en Santiago de Compostela. Segundo comentaron os veciños, durante toda a mañá houbo moito balbordo pola zona, con gritos, golpes e movementos sospeitosos de tres coches. Foi precisamente isto o que alertou a Policía Nacional.

Dúas patrullas achegáronse para identificar os ocupantes, pero estes escaparon. Durante a persecución foron sumándose máis patrullas da Policía Nacional. Varias testemuñas aseguran que os vehículos pasaron a máis de 100 quilómetros por hora polo túnel do Hórreo, poñendo en perigo varios condutores. A policía conseguiu interceptalos, tras trece quilómetros de persecución, na localidade teense de Vilar de Francos. Os fuxidos ían en tres vehículos. A Policía Nacional detivo catro persoas e identificou outras oito.

José López vive nas proximidades e viu o momento das detencións. Dixo que había un gran despregadura policial, catro patrullas da Garda civil, seis ou sete da Policía Nacional, varios vehículos camuflados e da Policía Local. Apunta que tiñan aos detidos tirados no chan e que algún deles estaba esposado.

Aos detidos impútanselles varios delitos de desobediencia grave á autoridade e contra a seguridade do tráfico. Nos rexistros efectuados nos vehículos, a policía atopou varias armas brancas e bates de béisbol. As primeiras hipóteses apuntan a unha liorta entre dúas familias por un tema de honor. De feito, á Garda Civil xa lle constaban varias ameazas por redes sociais entre os dous clans e levaban varios días realizando unha vixilancia preventiva.

Os detidos pasaron este mediodía a disposición xudicial. Fontes policiais aseguráronnos que permanecen no calabozos dos xulgados á espera de coñecer as medidas que determine o xuíz de garda.