Prisión para unha das dúas mulleres que secuestraron unha anciá en Vilalba

Os veciños de Muimenta quedaron sorprendidos cando se produciu esta detención, nun bar céntrico e no primeiro día das festas. Dúas mulleres foron acusadas dunha boa presada de delitos: detención ilegal, estafa, apropiación indebida, omisión do deber de socorro e abandono de persoas necesitadas de especial protección. E fixéronllo todo a unha anciá, de 89 anos, que vivía soa nunha zona rural de Vilalba.

O que fixeron foi sacar a muller do seu domicilio e levala a outro piso no centro de Vilalba. A vítima estaba desorientada, pero, decatándose de que non miraban por ela, chamou a Cruz Vermella, co dispositivo que levaba enriba. Pero cando foron buscala á casa, non estaba. Así que a oenegué chamou a Garda Civil para localizala.

O caso lévano no xulgado de Vilalba, que deixou en liberdade a outra detida. As dilixencias continúan abertas, porque despois se demostrou que da conta da anciá se sacaran 32.000 euros en efectivo e todo indica que é a persoa que está en prisión a que quitou os cartos. A vítima está agora a salvo nunha residencia de anciáns.