Detido en Lugo tras acoitelar, por erro, o camareiro dun bar

En Lugo detiveron un home como presunto autor dun delito de lesións agravadas tras acoitelar a un camareiro por erro. 

A vítima, que traballa nun establecemento próximo ao lugar do ataque e saíra a tomar algo ao finalizar a súa xornada laboral, foi increpada por un grupo de mozos na rúa Clérigos. Nun momento da liorta, un dos atacantes sacou unha navalla, apuñalouno e fuxiu.

As persoas que presenciaron o ataque avisaron a policía e a emerxencias.  

"A esas horas da madrugada había moita confluencia de xente. Foi atendido inmediatamente polas persoas que estaban alí taponando a ferida. A ambulancia chegou enseguida", di Manuel Arias, voceiro da Policía Nacional en Lugo.

Varias patrullas da Policía Nacional acudiron ao lugar e, pouco despois, detiveron o presunto agresor no centro de Lugo. Grazas ás indicacións das testemuñas, o agresor foi localizado e detido pouco despois.

"Recóllense alí as primeiras informacións e coa descrición que dan e a gran despregadura policial estaba detido e trasladado á Comisaría cinco minutos máis tarde", comenta Arias. 

Este relatoulles que acoitelou a vítima "para vingarse", ao confundila co porteiro doutro local que o botara do establecemento horas antes do ocorrido.

A policía continúa coas pescudas: "Fálase dun motivo concreto para a agresión pero imos agardar aos investigadores que fagan o seu traballo e que logo sexa o xulgado quen decida".

O detido quedou en liberdade tras pasar a disposición xudicial. O xuíz impúxolle unha orde de afastamento da vítima e do pub en que este traballa. 

O suceso causou unha gran conmoción entre os hostaleiros da zona histórica, porque a vítima é un camareiro coñecido. O home ingresou no hospital con prognóstico reservado, pero evoluciona favorablemente das súas feridas.