Detido o líder dun grupo dedicado ao roubo de motos de gran cilindrada en Pontevedra
Detido o líder dun grupo dedicado ao roubo de motos de gran cilindrada en Pontevedra
A policía logrou recuperar tres vehículos e varias pezas do garaxe no que as depositaban
A organización criminal vendía as pezas no mercado de segunda man e contaba coa capacidade técnica para desactivar os sistemas de alarma e bloqueo
Unha das motocicletas roubadas / Policía Nacional
Axentes da Policía Nacional de Pontevedra detiveron o líder dunha organización criminal dedicada ao roubo con forza de motocicletas de gran cilindrada, así como de accesorios como cascos e roupa técnica de moto.
Segundo informou o corpo policial nun comunicado, a investigación da operación Valentino comezou a finais de xuño tras detectarse en Pontevedra un inusual incremento de roubos destes vehículos.
Os investigadores "obtiveron indicios claros" de que podía tratarse dun grupo organizado e especializado neste delito ao detectar que os presuntos autores tiñan capacidade técnica para inutilizar os sistemas de alarma e bloqueo das motocicletas e, ademais, desmontaban e vendían as pezas no mercado de segunda man para obter beneficio.
Posteriormente, os axentes identificaron os membros do grupo criminal, composto por tres homes e unha muller, e comezaron un dispositivo co que localizaron o garaxe onde depositaban as motos roubadas.
Desta forma, coa colaboración da Policía Local, detiveron o líder do grupo e conseguiron recuperar tres motos roubadas, así como varias pezas antes de ser vendidas ou instaladas noutros vehículos desas características tamén subtraídos.
