Detidos dous homes por roubo de cable de cobre na comarca de Ferrolterra

A Garda Civil comunicou este sábado a detención de dous homes como presuntos autores de varios roubos de cable de cobre nos municipios da Capela e Valdoviño, dentro dunha investigación relacionada con delitos contra o patrimonio, iniciada en setembro.

As pescudas comezaron por roubos no tendido telefónico en ambos os dous concellos onde "cortaron e subtraeron grandes cantidades de cable, ocasionando un prexuízo económico grave á empresa encargada da instalación e unha interrupción do servizo telefónico" nesas áreas.

O corpo de seguridade detallou que o "seguimento exhaustivo das vendas de cable de cobre en establecementos de material metálico permitiu identificar un sospeitoso que realizara vendas de máis de 500 quilogramos nunha chatarrería da comarca da Coruña".

Entón, os axentes "centraron a súa atención no individuo e nun presunto cómplice", tras o testemuño dun veciño da zona afectada que alertou da presenza de ambos os dous nas inmediacións do encoro das Forcadas, en Valdoviño.

Nese lugar, planeaban "presumiblemente realizar un novo roubo", polo que a Benemérita estableceu "un dispositivo que permitiu a interceptación dos sospeitosos cando circulaban nun camión tras abandonar o lugar do roubo".

"No vehículo atopouse unha mangueira de cobre que coincidía plenamente coa subtraída, así como diversas ferramentas de corte", remarcou a Garda Civil.

Os arrestados, un residente en Ferrol e outro nas Pontes, foron postos a dispor dun xulgado de Instrución e da Fiscalía de Ferrol.