Desartellada unha banda con servizo de 'teledroga' e gastos de envío en Andalucía

A Garda Civil desartellou unha banda dedicada á venda de heroína e cocaína en diversas localidades andaluzas. Tiñan organizado un sistema de 'teledroga', polo que lle cobraban os gastos de envío á clientela. Foron detidas 23 persoas.

Os dirixentes da organización preparaban as doses coa droga. Estaban especializados na elaboración de rebujito, unha mestura de heroína e cocaína, e tamén vendían a coñecida coma cocaína rosa.

Os pedidos recibíanos por teléfono e logo repercutíanlle o custo da distribución á persoa que compraba. Contaban con varios vixilantes.

A Garda Civil realizou varios rexistros. Tamén requisaron cartos e armas. Xa pasaron a disposición xudicial os 23 membros da banda.

Hai cinco meses xa se detectara outra rede de distribución de 'teledroga' en Andalucía.