Dez escenarios diferentes decoran o Nadal no concello de Allariz

A neve callou en Allariz. É tempo de poñer gorros, luvas e bufandas.

"É a decoración branca, totalmente distinta á doutros sitios, marabillosa", comenta unha visitante.

Non debe ser a única que pensa así, á vista de como está a vila no primeiro domingo desde a inauguración.

"Quizais a orixinalidade e o medio no que estamos". "Gústanos moito porque é orixinal, cada ano aumentan as estruturas e está moi bonito", comentan os turistas.

A decoración, na que investiron 12.000 euros, repártese por distintos escenarios da vila; en cada un, seu motivo diferente. Todos, elaborados artesanalmente, con pedra, madeira e auga, estanques recuperados do festival de xardíns.

"Cada ano, como van cambiando os bonecos, parece que che van contando unha historia nova. Eu creo que ese é o maior atractivo", asegura unha moza da Cañiza.

E cando chega a noitiña, acéndense as luces e as estampas adquiren outra dimensión.

"Nós somos de Xinzo e tamén temos unha decoración bonita, pero hai que ir visitando outros lugares", di unha moza.

Queda un mes por diante para seguir descubrindo lugares.