Dous anos de prisión para cada un dos acusados de fabricar tabaco ilegal en Coles

Dous anos de prisión e unha multa de doce millóns de euros é a pena establecida para cada un dos acusados de fabricar tabaco ilegal en Coles. Foi o acordo ao que chegaron os avogados da defensa coa fiscalía. Acordo que fixo que xa non tivese que celebrarse o xuízo que estaba previsto para esta mañá na Audiencia Provincial de Ourense.

Os cinco acusados que permanecían en prisión provisional chegaban esta mañá esposados á Audiencia Provincial de Ourense para seren xulgados por fabricar tabaco ilegal en Coles. Pero o xuízo finalmente non se celebrou. A fiscalía chegou a un acordo coa súa avogada e co avogado doutros dous acusados que permanecían en liberdade, Manuel Ferreiro.

"Estaban acusados de varios delitos pertenza a banda criminal, contrabando de tabaco e delicto fiscal ao final quedouse todo nun delito de contrabando de tabaco cometido de xeito organizado e impuxéronselles a pena de dous anos de prisión e doce millóns de multa a cada un deles, eses millóns se non os pagan substitúense por outro ano de prisión"

Non cumprirán a pena se non delinquen en tres anos, os que aínda estaban sairán mañá do cárcere porque levaban en prisión dende agosto de 2020. Foi daquela cando a Garda Civil desartellou a banda nunha operación que denominou "o maior golpe ao contrabando de tabaco en España".

Nunha nave de Cambeo, no concello de Coles, fabricaban tabaco en segredo e fóra da legalidade. Tiñan outra nave en Ponteareas. Para iso, segundo o escrito da fiscalía, o líder, en busca e captura ao igual que outros tres detidos, traían traballadores non regularizados do estranxeiro.

Incautáronse de máis de 150 toneladas de tabaco e 600.000 cigarros feitos. Empregaban filtros, paquetes e caixas idénticos aos de Marlboro. Ademais da multa, terán que indemnizar a industria tabaqueira con outros doce millóns de euros.