Centos de transportistas protestan en Vilalba pola situación do sector

Máis dun cento de camións comezaban a protesta no polígono industrial de Vilalba. Pouco despois dirixíanse cara ao centro da vila e percorrían as rúas e a contorna do concello. Uníanse a eles ducias de tractores como mostra de apoio dos agricultores e gandeiros da zona. 

Denuncian que non poden facer fronte á suba dos combustibles e dos custos de produción e pídenlle ao Goberno que se sente a negociar.    

Neste sexto día de mobilizacións, o sector volve denunciar unha situación que cualifican de "gravísima" e "insostible" e que, aseguran, pon en risco a súa supervivencia.

A marcha dos transportistas desenvolvíase este sábado sen incidentes. A Garda Civil detivo o venres un home de 28 anos, veciño de Vilalba, acusado de coaccións e de provocar danos a un vehículo. Por outra parte, outro home era detido esta mañá tras ser sorprendido mentres picaba as rodas de dúas furgonetas na zona de Puxeiros, en Mos, Pontevedra.

A Garda Civil e a Policía continuaban ademais este sábado, xa desde a madrugada, a escoltar transportistas que se dirixían a distintos puntos loxísticos para intentar garantir o abastecemento de produtos esenciais na nosa comunidade. Estas son imaxes difundidas pola Delegación do Goberno en Galicia.