Prisión provisional para os galegos detidos na operación contra a rede de narcolanchas de Xibraltar

As dúas persoas detidas na provincia de Pontevedra no operativo que permitiu a desarticulación da considerada como maior rede de narcotransportistas do Estreito ingresaron este mércores en prisión.

Os dous arrestados en Galicia dentro da operación Grajuela prestaron declaración ante un xulgado de instrución de Sanlúcar de Barrameda encargado da dirección da investigación. Fixérono por vía telemática desde os xulgados de garda de Cambados e Caldas de Reis.

Trátase de dous dos 31 detidos (doce dos cales xa se atopaban en prisión) na operación conxunta entre funcionarios de Vixilancia Aduaneira da Axencia Tributaria, axentes da Policía Nacional, Garda Civil e a Policía Judiciária de Portugal, e coordinada pola Fiscalía Especial Antidroga de Xerez da Fronteira.

Na operación practicáronse 24 rexistros domiciliarios e abortáronse ata catro operacións da organización. Incautáronse tres armas curtas, 1,4 millóns de euros en efectivo, 19 vehículos de alta gama, sistemas de comunicación, material informático, dúas narcolanchas no país luso e outras tres embarcacións en España.

O centro de operacións estaba situado nunha luxosa urbanización de Lisboa, desde onde un histórico narcotraficante dirixía e coordinaba todas as operacións navais.

Tamén contaban con infraestrutura e unha ampla rede de colaboradores na localidade gaditana de Sanlúcar de Barrameda, de onde eran orixinarios os xefes da trama.

A investigación acreditou que os xefes da organización, orixinarios de Sanlúcar de Barrameda, empregaban esta cidade gaditana como base de operacións en España, debido ao perfecto coñecemento que tiñan da zona, así como á nutrida rede de colaboradores coa que contaban no devandito municipio.

A organización dispoñía dunha media de entre oito e dez narcolanchas, que se atopaban en todo momento na auga coas súas respectivas tripulacións, así como dunha nutrida rede de pequenas embarcacións que utilizaba para facilitar ás anteriores todo o necesario, como víveres ou gasolina.

A investigación iniciouse en maio do pasado ano, cando os axentes detectaron que a organización criminal tratou de recoller un cargamento de 6.000 quilos de cocaína dun narcosubmarino proveniente de América do Sur.

Con todo, os problemas mecánicos que sufriu a embarcación durante a travesía provocaron o seu afundimento, o que frustrou a acción criminal.

A partir dese momento, as pescudas policiais xiraron arredor do funcionamento da estrutura da organización, acreditando que os líderes da mesma estaban asentados nas localidades gaditanas de Sanlúcar de Barrameda, Chipiona e El Cuervo, en Sevilla.