Dous mozos do Irixo apostaron por emprender no rural cun negocio apícola

Tiñan o seu traballo en Santiago pero decidiron trasladarse a vivir ao rural e apostaron por emprender. Con colmeas na familia, hai un ano puxeron en marcha o seu propio negocio relacionado co mel.

Brais Bernárdez, mozo emprendedor: "Comezamos por catro colmeas, para probar, e agora xa temos 90 e para o ano queremos chegar ás 200".

Andrea Regueiro, moza emprendedora: "E despois xa establecemos a marca como tal e creamos os outros produtos".

Ademais de mel, tamén elaboran candeas e mesmo cosmética natural. Venden a través de Internet e en pequenas tendas. Por agora aínda o compaxinan con outros traballos.

Brais Bernárdez: "Coa idea de, nun futuro próximo, canto antes mellor, poder vivir disto e do rural".

O seu caso non é habitual. En Ourense xa hai neste intre máis maiores de 65 anos á fronte dun negocio que menores de 30. Andrea e Brais recoñecen que os inicios son complicados pero teñen claro que volverían emprender apostando sempre polo rural.

Andrea Regueiro: "Porque é moi necesario e ademais non es consciente da calidade de vida que ganas. Traballas, si, pero falo ao teu ritmo e vives nisto que me rodea agora mesmo. Que máis queres!".