En coidados intensivos un mariñeiro de Foz que caeu ao mar envolto nuns aparellos
En coidados intensivos un mariñeiro de Foz que caeu ao mar envolto nuns aparellos
A vítima do accidente salvou a vida grazas a que puido cortar os cabos cunha navalla
Un mariñeiro de Foz tivo que ser hospitalizado tras sufrir un accidente no barco en que estaba a traballar. Tratábase do Jormar, un pesqueiro de baixura con base en Burela.
O tripulante, de 53 anos, caeu ao mar nunha zona próxima ao porto burelao, con tan mala sorte que quedou envolto nuns aparellos.
Por fortuna, a vítima do sinistro levaba unha navalla coa que puido cortar os cabos. Iso si, o tempo que botou na auga provocoulle unha seria hipotermia.
Juan Carlos Modia, Policía Local de Burela: "O patrón dicía que grazas á axilidade do mariñeiro, logrou salvar a vida. Íase para o fondo, arrastrado polos cabos, e grazas á navalla que levaba no peto, subiu para arriba e puidérono rescatar. Se non, desaparecía no mar".
Unha vez localizado polos seus dous compañeiros, izárono, practicáronlle os primeiros auxilios e avisaron o 112. Ao mesmo tempo, o barco dirixiuse a toda máquina ata o porto de Burela, onde xa agardaban os servizos de emerxencias, a Garda Civil e a Policía Local.
Juan Carlos Modia, Policía Local de Burela: "A UVI móbil ía diante, e cando chegamos xa había unha ambulancia esperando. O barco veu para este peirao do fondo, onde agardaban os sanitarios. O certo é que o home viña cunha forte hipotermia, con moitísimo frío".
Dende o porto de Burela, o mariñeiro foi evacuado ata o Hospital da Mariña, onde permanece ingresado, en estado grave, na unidade de coidados intensivos. Pola súa parte, as autoridades están a investigar as circunstancias deste sinistro.
