Entrega dos premios Catas de Galicia 2023 no pazo de Quián en Boqueixón

O conselleiro do Medio Rural clausurou este luns a gala das Catas de Galicia 2023 no Pazo de Quián en Boqueixón. Un evento moi agardado que distingue os mellores viños, augardentes e licores tradicionais da nosa terra.

José González salientou o papel do sector vitivinícola na contribución da Marca Galicia por todo o mundo axudando tamén a impulsar a economía no rural. Case 500 adegas e máis de dez mil viticultores traballan neste sector que xera 230 millóns de euros ao ano.

Lembrou tamén que a Xunta ten en marcha a estratexia de dinamización económica, territorial e turística das comarcas vitivinícolas e axudas para a comercialización ou a promoción dos viños e licores galegos.

O conselleiro aproveitou a situación para darlle as grazas ao exconselleiro de Agricultura Fernando Garrido, que recibiu o premio de honra en representación de todas as persoas que hai máis de 35 anos apostaron polo potencial do sector vitivinícola galego e puxeron en marcha iniciativas para revitalizalo.