Esnaquizan unha viña da adega Moraima en Barro cortándolle 900 cepas

Os socios da Adega Viña Moraima, en Barro, descubriron que alguén cortou na noite do xoves máis de 900 cepas das vides que teñen nun terreo a carón do seu local.

Estiman unhas perdas dun 120.000 euros porque a colleita deste ano está perdida, as vides novas tardarán catro anos en producir e algunhas das mellores cepas, que eran centenarias, xa non se poderán recuperar.

O venres pola mañá os socios descubriron que o máis da colleita de albariño e caíño estaba cortada.

"Achegámonos e vimos os cortes. Fixéronse nas cepas máis novas con cizallas e nas máis vellas supoñemos que se fixeron con serras eléctricas, a batería para non facer ruído. Foron cortadas sobre 900 e son cepas de catro anos que nós plantamos e despois, o que máis nos doe son cepas centenarias que se salvaran e se recuperaran e que agora tamén foran cortadas", relata Roberto Rivas, socio da cooperativa Viña Moraima. 

Ante os danos presentaron denuncia na Garda Civil. Non saben a que responde esta agresión á súa colleita, din que non teñen problemas con ningún socio, nin traballador, nin acredor, e que é traballo de anos.

"Estamos falando arredor dos 120.000 euros. Pero ademais está o valor incalculable das cepas vellas. Aí o que temos que facer é pedir a valoración dalgún técnico que revise estas cepas", di Rivas.

A Garda Civil examina agora as imaxes dunha cámara de vixilancia instalada nunha empresa lindeira para ver se axudan na investigación dos feitos.