España dirixe un operativo contra o tráfico de armas e a trata de persoas con 382 detidos

Un total de 382 persoas foron detidas no sueste de Europa nunha operación policial contra o tráfico de armas de fogo, a trata de seres humanos, a inmigración ilegal e o tráfico de drogas. No operativo participaron preto de 16.000 axentes de 28 países que realizaron máis de 35.000 inspeccións e abriron 130 novas investigacións no sueste de Europa que se saldaron con 382 detencións e a apertura de 130 investigacións.

Na fase operativa, que se desenvolveu entre o 26 e o 29 de outubro, controlouse a 74.000 persoas, inspeccionáronse 32.665 vehículos e efectuáronse preto de mil rexistros. Comisáronse 91 armas de fogo, 15 granadas de man, 12.250 cartuchos de munición, 304 quilos de heroína, 147 de cánnabis, 5.402 plantas de marihuana e 1,3 quilos de cocaína.

Na operación colaboraron axencias internacionais como Eurojust, Frontex e Interpol. Enmarcouse na Plataforma Multidisciplinar Europea contra as Ameazas Delituosas (EMPACT), que impulsa a acción coordinada dos países da UE fronte ás ameazas máis graves da delincuencia internacional.

En España dirixiuse desde o centro de control habilitado na sede do Centro de Intelixencia contra o Terrorismo e o Crime Organizado, en Madrid, que permitiu o intercambio de información en tempo real con todos os participantes e co centro de control internacional, liderado por España, que foi establecido en Montenegro.

O operativo español estaba formado por axentes de Policía Nacional, Garda Civil, Mossos d'Esquadra e representantes da Unidade Nacional de Europol e da Oficina Central Nacional de Interpol.