O risco de reinfección da ómicron é cinco veces superior ao da delta
O risco de reinfección da ómicron é cinco veces superior ao da delta
Rexístranse máis recaídas en dúas semanas que en toda a pandemia
Os síntomas na maioría dos reinfectados son leves
Respecto á variante ómicron, os expertos alertan da cantidade de reinfeccións que está provocando. En dúas semanas rexistráronse máis recaídas que durante toda a pandemia, case 21.000 casos, aínda que a maioría son leves.
O risco de reinfectarse coa ómicron é cinco veces superior ao da delta. Antes de que Suráfrica identificara esta variante, altamente contaxiosa, só dúas de cada 100 persoas que superaban a enfermidade recaían.
Agora, coa ómicron, nas dúas ultimas semanas rexistrouse unha reinfección por minuto. Contabilizaron 20.890 casos, máis que en toda a pandemia, e algúns dos afectados contaxiáronse ata tres ou catro veces. Alfredo Corell, inmunólogo:
"Os anticorpos non acaban de recoñecer ben esta variante e iso fai que infecten inicialmente moita máis xente".
Este inmunólogo asegura que a alta porcentaxe de vacinación en España evitou que a ómicron provocase un masacre. A maioría dos casos son leves, aínda que as persoas non vacinadas si poden ter síntomas máis graves. Corell non é optimista sobre a fin da pandemia.
"Mentres non estea vacinado todo o planeta pode xurdir outra variante pasado mañá e poñer o contador a cero".
De feito, en Chipre e o Camerún identificaron dúas novas versións do virus, pero os expertos cren que non van ser relevantes. Din que unha delas, que combina a delta e a ómicron, probablemente acabará eclipsada pola variante surafricana por ser máis contaxiosa.
