Falece un home ao chocar coa súa moto cun vehículo en Viana do Bolo
Falece un home ao chocar coa súa moto cun vehículo en Viana do Bolo
Os sanitarios só puideron certificar a morte do motorista
Un motorista perdeu a vida este luns tras colidir a moto en que circulaba contra un turismo na parroquia de Pexeiros, no municipio ourensán de Viana do Bolo.
Segundo trasladou o 112 Galicia, un particular advertía sobre as 15.10 horas deste accidente no punto quilométrico 6 da estrada OU-533.
🔴#AXEGAInforma dun motorista que perdeu a vida en #VianadoBolo ao bater contra un coche, na parroquia de Pexeiros. Os sanitarios, malia mobilizar un helicóptero medicalizado, só puideron confirmar o seu falecemento. Interveñen: #GESAGudiña, #PolicíaLocal e @guardiacivil Tráfico. pic.twitter.com/D9Gl0gonuA
— 112Galicia (@112Galicia) September 19, 2022
Nesta comunicación, o alertante reclamaba asistencia para o motorista. Con esta información, os xestores do 112 deron aviso aos servizos sanitarios.
Para esta emerxencia mobilizouse o helicóptero medicalizado, aínda que os profesionais sanitarios tan só puideron confirmar o falecemento do motorista.
Ao lugar acudiron tamén membros do GES da Gudiña, a Policía Local de Viana e Garda Civil de Tráfico.
