Falece un home de 63 anos ao caerlle unha pedra enriba en Melón
Falece un home de 63 anos ao caerlle unha pedra enriba en Melón
Os bombeiros seguen traballando para asegurar a zona e poder evacuar ao falecido, pois a estrutura do inmoble é moi inestable e reviste risco de derrubamento
O suceso ocorreu dez minutos antes das 12:30 horas, momento en que un particular contactou co 112 Galicia para informar do que sucedera: a un home caéralle unha pedra enriba cando estaba nunha casa abandonada, en Quins, preto da Igrexa, sen poder saír de debaixo.
Os xestores do 112 Galicia pasaron o aviso aos Bombeiros do Carballiño para que puidesen liberar ao ferido. Do mesmo xeito, tamén se informou ao Servizo de Urxencias Sanitarias de Galicia-061, que mobilizou o helicóptero medicalizado con base en Ourense. Tamén tiveron coñecemento do suceso o GES de Ribadavia, a Garda Civil e a Agrupación de Voluntarios de Protección Civil de Melón.
🔴 #AXEGaInforma do falecemento dunha persoa en Melón.
— 112 Galicia (@112Galicia) September 19, 2024
📍 Lugar de Covelo, parroquia de Quins.
▶️ O home atopábase no seu tractor cando lle veu unha pedra enriba.
🔗 https://t.co/r8i5Ggabnk pic.twitter.com/M7Qa2YtubL
A dotación de bombeiros conseguiu liberar parcialmente a persoa, sen que se puidese facer nada por salvarlle a vida, pois xa falecera. Os servizos de emerxencias explicaron que puido ocorrer: o home atopábase traballando co seu tractor pola eira no momento en que a pedra, proveniente da casa en ruínas, caeu sobre el.
Os bombeiros seguen traballando para asegurar a zona e poder evacuar o falecido, pois a estrutura do inmoble é moi inestable e reviste risco de derrubamento.
