Falece unha muller de 59 anos en Lugo ao ser atropelada mentres cruzaba por un paso de peóns
Falece unha muller de 59 anos en Lugo ao ser atropelada mentres cruzaba por un paso de peóns
O sinistro produciuse no paso de peóns próximo á rotonda que dá acceso á Rolda Norte, por causas que aínda se descoñecen
Foto cedida por El Progreso
Unha muller de 59 anos perdeu a vida a pasada noite ao ser atropelada por un vehículo cando cruzaba, en compañía do seu marido, por un paso de peóns, na Avenida Infanta Elena Duquesa de Lugo.
Segundo a información facilitada polo Centro Integrado de Atención ás Emerxencias de Galicia (CIAE), o 112 foi avisado do accidente pasadas as 20:30 horas a través do servizo de urxencias sanitarias, cuxos efectivos xa avisaron da gravidade do atropelo.
🔴 #AXEGAInforma do falecemento dunha persoa ao sufrir un atropelo en Lugo.
— 112 Galicia (@112Galicia) November 4, 2024
📍 Avenida Infanta Elena Duquesa de Lugo.
▶ Os servizos de emerxencias nada puideron facer por salvarlle a vida.
🔗 https://t.co/IAp2DTOc68 pic.twitter.com/rAcCqmgoty
O sinistro produciuse no paso de peóns próximo á rotonda que dá acceso á Rolda Norte, por causas que aínda se descoñecen. A central de emerxencias deu aviso aos Bombeiros de Lugo e á Policía Local, cuxos axentes desviaron o tráfico e aseguraron o punto mentres trataban de reanimar a vítima. Con todo, os servizos de emerxencias acabaron confirmando o falecemento da muller.
