Falece un home atropelado en Vilagarcía ao cruzar en vermello un semáforo
Falece un home atropelado en Vilagarcía ao cruzar en vermello un semáforo
A vítima mortal, un varón duns 75 anos, pasaba o verán na vila coa súa familia
O accidente sucedeu na Avenida Rosalía de Castro, na recta de Carril, nun paso de peóns con regulación semafórica
Unha persoa morreu como consecuencia dun atropelo na Avenida Rosalía de Castro de Vilagarcía, na zona do parque A Compostela, nun paso de peóns á altura da Finca Artime da vila arousá.
O falecido é un varón duns 75 anos que tras recibir o impacto do vehículo sufriu un traumatismo cranioencefálico. O home cruzaba en vermello o semáforo existente á entrada do parque da Compostela sen decatarse da chegada do turismo, que transitaba en sentido a Carril, como informaba a Policía Local.
Un médico que pasaba pola zona en moto foi a primeira persoa que lle prestou auxilio ata a chegada das ambulancias e servizos médicos.
Ata o lugar desprazouse a Policia Local de Vilagarcía, que instrúe o atestado do tráxico accidente.
Os servizos de emerxencias do 112-Galicia, que se trasladaron tamén ata alí, non lograron reanimar a vítima do atropelo. Mobilizouse mesmo o helicóptero medicalizado do 061 con base en Santiago, que non chegou a intervir aínda que aterrou na praia Compostela. O médico que viaxaba a bordo só puido certificar a morte.
O falecido era un veciño de Madrid que estaba na cidade canda a súa familia gozando dunhas xornadas de vacacións.
O accidente obrigou a cortar o tráfico nun carril na estrada de saída de Vilagarcía cara Carril, o cal orixinou pequenas retencións.
A zona da Concha-Compostela é moi habitual para os paseos dos veciños da vila.
🔴#AXEGAInforma dun atropelo mortal en Vilagarcía.
— 112 Galicia (@112Galicia) July 7, 2024
📌 PO-548, á altura no número 78, recta de Carril.
🔗 https://t.co/hOXTIf5t1S pic.twitter.com/pVatYszEg4
