Ferida unha muller en Santa Comba tras esnafrarse un coche contra a súa casa
Ferida unha muller en Santa Comba tras esnafrarse un coche contra a súa casa
A muller, que estaba no salón, escoitou o golpe e viu como se lle viña a parede enriba
O condutor e o acompañante marcharon antes de que acudisen os servizos de urxencia
O vehículo, de gama alta, conducido por un mozo veciño da zona arredor das 11 e media da noite deste sábado foi dar contra a fachada da vivenda.
Nun treito, sinalizado a 70, o condutor perdeu o control e o coche foise por fóra da vía, entrou por enriba dun xardín, esquivando un farol e acabou batendo contra a vivenda. Finalmente parou dentro do terreo da vítima.
Na casa estaba a muller sentada no salón que escoitou un forte impacto e viu como se lle viña a parede abaixo. A vítima sufriu varias contusións causadas polos cascallos e foi trasladada ao hospital. Este mediodía podía volver para o seu domicilio moi afectada polo sucedido.
Marcharon do lugar
Segundo confirmou Protección Civil, cando eles chegaron ao lugar, 15 minutos despois de se producir o accidente, no vehículo xa non había ninguén e o coche presentaba danos importantes.
Tanto o condutor coma o acompañante, identificados polos veciños nos primeiros momentos, abandonaran o lugar do accidente despois do ocorrido, os dous saíron ilesos.
A investigación da Garda Civil determinará as causas da saída de vía e a desaparición do condutor e o acompañante despois do sinistro.
