Ferido un maquinista tras descarrilar un tren de mercadorías en Lalín
Ferido un maquinista tras descarrilar un tren de mercadorías en Lalín
O maquinista sufriu un golpe na cabeza tras o sinistro e foi trasladado ata un centro médico
Os servizos de emerxencias continúan traballando no punto para retirar a máquina accidentada da vía
O tren, de transporte de mercadorías non perigosas e que cubría a ruta Santiago-Ourense, descarrilou tras atoparse cun derrubamento sobre a vía e acabou por colidir contra o piar dunha ponte que circula por enriba.
A locomotora e varios vagóns quedaron envorcados lateralmente, mentres que o maquinista puido saír coa axuda dos bombeiros de Silleda, que non tiveron que empregar o material de liberación. O accidentado non presentaba feridas de consideración. Sufriu un golpe na cabeza tralo sinistro e foi trasladado ata un centro médico.
Segundo informou o 112, sobre as 9:15 horas deste martes o Centro de Seguridade de Adif informaba de que un tren de mercadorías sufrira un accidente nas proximidades da estación de Lalín, en sentido Ourense.
O punto localízase á altura do quilómetro 7 da PO-902, e desde Adif confirmaron que nesa zona non hai catenaria e que o tren non transportaba ningún material.
Segundo o 112, o maquinista do convoi permaneceu consciente en todo momento, e desde os servizos de emerxencias indicáronlle que non abandonase a cabina ata que chegaran ao lugar. Estaba, iso si, atordado ao sufrir un golpe na cabeza tralo sinistro.
No operativo participaron o persoal de Urxencias Sanitarias de Galicia-061, a Garda Civil, os bombeiros de Silleda, o GES de Lalín, a Policía Local e os membros do Servizo Municipal de Protección Civil de Lalín e o persoal de Emerxencias de Adif.
Polo de agora, os servizos de emerxencias continúan traballando no punto para retirar a máquina accidentada da vía.
