Última fin de semana de xullo con cheo total no arquipélago das Ons
Última fin de semana de xullo con cheo total no arquipélago das Ons
É o segundo territorio, despois das Cíes, máis visitado do Parque Nacional das Illas Atlánticas
O arquipélago de Ons, formado polas Illas de Ons e Onza, é o segundo territorio máis visitado do Parque Nacional das Illas Atlánticas. Esta fin de semana de xullo, ás portas de agosto, as navieiras colgaron o cartel de non hai localidades.
Non hai billetes dispoñibles ata o martes. En domingos coma este da segunda quincena de xullo aquí hai mil cincocentas persoas, que é o máximo permitido. Mil trescentos que van por libre e uns douscentos que se inscribiron nunha excursión con guía turístico.
Respecto ás Illas Cíes, onde os viaxeiros reservan con meses de antelación e son maiormente de fóra, en Ons o perfil do turista é de xente de preto, moitos galegos, que compran o billete con moi poucos días de antelación.
No ano 2023 visitaron esta Illa máis de 143.000 persoas, o máximo histórico que está en camiño de ser superado neste 2024.
Catro rutas sinalizadas
Das catro rutas sinalizadas, as máis concorridas son a do buraco do Inferno e a do Faro a 120 metros de altura que ofrece unha panorámica excepcional da inmensidade atlántica. Ons é a segunda máis visitada do Parque Nacional por tras das Cíes.
"Vén xente local de Galicia, que fai a súa visita unha vez ao ano. Fano porque as illas Cíes xa teñen a súa cota cuberta. A de Ons é unha Illa menos coñecida, pero é certo que unha vez que a coñecen, repiten, recomendan a visita e volven. As vistas son preciosas ata o interior da ría de Pontevedra, os miradoiros moi fermosos, e os areais tamén. Están á altura do Caribe", conta a TVG Lorena Nieto, coordinadora de actividades na navieira Mar de Ons.
"É a máis humanizada porque houbo unha comunidade de habitantes que se prolongou na historia. Normalmente a xente unha vez que marcha de aquí sempre marcha dicindo que visitaron un verdadeiro paraíso, e os que somos da zona así o consideramos tamén", engade Nuria Búa, guía turística do Parque Nacional das Illas Atlánticas.
"Co sol hai moitísima xente, a verdade, é que temos a cota completa. Eu lembro cando aquí viñan só tres ou catro barcos e agora veñen moitos de todos os sitios e con moitos visitantes", relata Adrián de Manolo, 'O pescadilla'.
Ons pertence ao concello de Bueu. Fronte a outras illas salvaxes, como as Cíes, aquí respiran vida de aldea. Ata os anos sesenta aquí vivían cincocentas persoas e había 9 parroquias.
Pero o segredo leva tempo estando á vista. Praias, sol, auga fría... Non sabemos se o que vén o publica, pero o que si é certo é que o que visita Ons, repite.
