Fitur abre as súas portas, por María Loureiro

Unha das feiras máis grandes do turismo no mundo abre as súas portas nun bo momento para o sector. O turismo internacional recuperarase en 2024 e espérase que alcance os niveis rexistrados antes da pandemia. Segundo a Organización Mundial do Turismo (OMT), a reapertura de varios mercados emisores e destinos impulsará a recuperación e podería mesmo superar un 2 % o volume de chegadas internacionais de 2019. Ademais, espérase que o turismo se acelere grazas á facilitación dos visados tanto na China como no medio Oriente e África, fundamentalmente.

O número de turistas que recibiu España en 2023 superou os 84 millóns, por riba de cifras récord de 2019, segundo as previsións do Ministerio de Industria e Turismo, cun gasto de máis de 108.000 millóns de euros. A chegada de turistas conseguiu superar a cifra récord de 2019, un ano antes da pandemia, nun 1 %, ademais de ser un 19 % máis alta que a de 2022, unhas cifras que se confirmarán e ampliarán a próxima semana con datos do Instituto Nacional de Estatística.

O gasto creceu máis que os visitantes. Así, estes 108.000 millóns de euros supoñen un incremento do 17,4 % sobre os datos de 2019 e un 23,8 % máis que o ano anterior. Por outra banda, o sector acabou o ano co maior número de afiliados da serie histórica, segundo datos de Turespaña, e supoñía o 12,5 % do total de afiliados da economía do país a finais de decembro.

En canto ao primeiro cuadrimestre, prevese que continúe a senda do crecemento, con 23,2 millóns de turistas internacionais, case o dobre que os 13,7 millóns do ano anterior. Pola súa banda, o gasto en destino estimado de xaneiro a abril do ano pasado subiría un 18,5 %, ata os 30.432 millóns de euros, e espérase que siga esta tendencia neste ano. En resumo, as perspectivas, polo menos para o arranque de 2024, apuntan a que o turismo en España seguirá a liña ascendente do último exercicio.

En Galicia, a demanda aínda medrou máis comparativamente que no caso español. Segundo indicou a Xunta de Galicia, nos dez primeiros meses do ano fixéronse máis de 12 millóns de noites, o que supón incrementos do 6,5 % con respecto ao ano previo, 2022, que foi Ano Santo. Esta situación está a repercutir, ademais, desde o punto de vista económico, no sector como indican os índices de rendibilidade hoteleira, que están incrementándose un 7 %, os datos máis altos desde que hai rexistros.

O bo comportamento da demanda neste período vén como consecuencia dos incrementos rexistrados en nove dos dez meses, de xeito especial no primeiro semestre, coincidindo coa temporada baixa. No acumulado ata outubro, Galicia colócase como o primeiro destino do norte peninsular e o sétimo destino máis importante de España e sitúase por detrás de Cataluña, Canarias, Baleares, Andalucía, a Comunidade Valenciana e Madrid.

Os retos tamén son importantes durante o 2024. Para o ano 2024, enfocaranse nos aspectos ambiental, tecnolóxico e social para lograr un sector máis sostible, que non se sobresature e que respecte o medio e as súas xentes. En particular, será necesario reducir a pegada ecolóxica do sector turístico, que na actualidade ten un alto consumo de auga, nun país con déficit hídrico en máis do 35 % do seu territorio; ademais, deberá tratarse o achegamento entre as comunidades anfitrioas e os turistas, apoiando a boa convivencia e o entendemento entre ambos os dous para así xerar unha industria sostible.