Galicia, presente nunha das maiores feiras de turismo do mundo

Galicia está presente nunha das maiores feiras de turismo do mundo, que hoxe abriu as súas portas. Na capital do Reino Unido a nosa comunidade autónoma amosará ao mundo a oferta turística, a riqueza paisaxística e gastronómica. 

É un dos maiores escaparates do turismo, unha cita de referencia mundial na capital do Reino Unido. Esta edición, que é a número 43, é moi importante para o sector, é a primeira que se celebra con normalidade desde a pandemia. E Galicia está presente.

"Sobre todo nun ano tan especial como é este Xacobeo 21-22, en que o Camiño de Santiago é dos máis queridos por este sector, por este destino emisor, como é o británico", afirma Nava Castro, presidenta de Turismo de Galicia.

"O mercado inglés é o terceiro ou cuarto que chega a Galicia; o auxe do Ano Santo foi espectacular, e moitos dos turistas ingleses están chegando a través do aeroporto do Porto e, sen dúbida, é un mercado moi importante para nós", comenta Cesáreo Pardal, presidente do Clúster de Turismo de Galicia.

Pero Galicia ten máis que ofrecer ca o Camiño.

"Evidentemente o Camiño de Santiago ten que  estar aquí representado, pero tamén o turismo náutico, o turismo vitivinícola, o de golf e tamén o camiño relixioso. O que fai que desestacionalicemos", declara Jesús Picallo, vicepresidente do Clúster de Turismo de Galicia.

Na feira están 25 empresas do sector turístico galego.

"Galicia como destino turístico xa é un referente en España. O que buscamos agora é que tamén o sexa internacionalmente, por iso participamos en feiras tan importantes como a de Londres", di Jaime Garrido, director do hotel Pazo dos Escudos.

Dos 3.000 expositores, 70 son debutantes. Entre os que participan por vez primeira está, por exemplo, a Asociación de Turoperadores de Uganda.