Os gandeiros levan vacas e tractores a Lugo para esixir a suba do prezo da carne en orixe
Os gandeiros levan vacas e tractores a Lugo para esixir a suba do prezo da carne en orixe
O presidente de Gandeiros Galegos da Suprema recoñeceu que a subida dos custos de produción está “a afogar” as explotacións galegas
Os gandeiros quédanse indefinidamente ante a Xunta e a Subdelegación do Goberno en Lugo
Tirando de aforros ou sacrificando vacas reprodutoras para ter liquidez. Así viven moitos gandeiros galegos unha crise de prezos que, segundo din, podería provocar o peche de moitas explotacións.
Gandeiros de carne, convocados por Gandeiros Galegos da Suprema, protestan polos recortes nas axudas da Política Agraria Común (PAC), os elevados custos de produción e o baixo prezo da carne en orixe. “Prezo é igual a profesionalización e a vida no rural. Se hai prezo, hai profesionais”, di Santiago Rego.
Máis de medio milleiro de produtores, con tractores e vacas, pediron solucións nas rúas de Lugo. Non entenden que o consumidor pague cada vez máis mentres eles seguen a cobrar o mesmo que hai 30 anos.
Afirman que lles pagan a tenreira a 5,60 euros quilo canal, mentres que teñen uns 6,20 de custos de produción, referenciados aos datos 2021 antes da guerra de Ucraína, un conflito que fixo subir os cereais e todos as subministracións.
Din que algunha explotacións sacrifican vacas para poder seguir adiante, porque o vacún maior si que subiu de prezo, pero isto ten un custo a longo prazo que é diminuír a capacidade reprodutiva da cabana.
Os gandeiros quédanse de xeito indefinido ante a Xunta e a subdelegación do Goberno
O presidente da Asociación de Gandeiros Galegos de Suprema confirmou que un retén de produtores permanecerá de xeito indefinido ante a sede da Delegación Territorial da Xunta de Galicia en Lugo e da Subdelegación do Goberno.
Será, explicou o propio Rego, unha representación dos produtores de carne que permanecerá ante a sede de ambas institucións ata que sexan escoitados polo Ministerio de Agricultura e a Consellería do Medio Rural.
A maioría dos tractores que participaron este martes na manifestación polas rúas do centro de Lugo abandonaba a primeira hora da tarde a cidade, aínda que algúns quedaron ante a Delegación Territorial da Xunta en Lugo e cortaron o tráfico na Rolda da Muralla pola tarde.
A saída dos tractores do centro de Lugo tamén obrigou á Policía Local a cortar ao tráfico a rúa de San Roque a primeira hora da tarde.
