Un gromo da enfermidade da lapada esténdese entre os nenos na área de Vigo

Multiplicáronse nas últimas semanas na área sanitaria de Vigo os casos da enfermidade da lapada, chamada así porque os doentes teñen manchas vermellas nas meixelas como se lles deran un lapote.

Afecta maiormente a nenos de dous a tres anos, porque gran parte dos adultos están xa inmunizados. Segundo o inmunólogo Santiago Gómez Rial, é "a famosa quinta enfermidade, ese parvovirus 19 que lle chaman a enfermidade da lapada, é típica desta época, primavera e verán. Insistir en que é unha enfermidade benigna".

Trátase dun eritema infeccioso que se propaga polo aire a través da saliva. Aparecen erupcións moi vermellas nas meixelas, e os síntomas previos son os dunha lixeira gripe. Reyes Novoa, pediatra de urxencias di que "é moi escandaloso... é moi vermello e tamén teñen manchiñas no tronco e brazos. Cando saen as manchiñas xa non se contaxia, o contaxio é previo, e ás veces teñen algún cadro de algo de febre ou dor de cabeza antes de ter as manchiñas".

Non ten tratamento, só paracetamol ou ibuprofeno para calmar a febre e antihistamínico ou crema hidratante para aliviar o proído. Unha nai conta que "decateime porque o neno estaba incómodo con algo de febrícula, o rosetón na cara e pouco mais. Leveino ao pediatra e o diagnosticou". 

Un virus que ten nos colexios o seu caldo de cultivo e desaparecerá ao remate do curso escolar. Malia que é unha doenza benigna, os expertos recomendan precaución ás embarazadas.