Humanos e robots, man a man, fan chegar a comida aos pacientes do Cunqueiro

Os novos avances tecnolóxicos supuxeron un importante paso para axilizar os procesos de elaboración de comidas nos hospitais. Na cociña do Álvaro Cunqueiro, en Vigo, persoas e robots colaboran para facer chegar aos pacientes os seus menús. 

Sobre as 8 da mañá empeza todo o proceso. Nunha sala prepárase a comida que se elabora posteriormente nunha enorme cociña. Centos de menús, que chegarán aos pacientes do Cunqueiro e tamén aos do Meixoeiro e o Nicolás Peña.

Unha vez elaborada a comida chega o empratado. E despois entran en escena os robots. Cargan os carros cos menús e lévanos ás plantas correspondentes. Un proceso automatizado en que eles mesmos chaman o ascensor.

Unha vez que os carros chegan á planta é o momento da repartición dos menús. 

Despois os robots teñen máis traballo. Levan os carros coas bandexas a unha sala onde se limpan de forma automática, e se detecta se gustou a comida.

Para os profesionais que traballan neste departamento, case 160, e que se ocupan a diario deste complexo proceso, o mellor agasallo é recibir o agradecemento dos pacientes.