Inician as probas de carga para tentar retirar o bus accidentado do Lérez

Técnicos do Ministerio de Transportes coordinan desde primeira hora da mañá deste martes o operativo despregado en Cerdedo-Cotobade para tratar de extraer o autobús accidentado en Noiteboa do leito do río Lérez.

Un guindastre de grandes dimensións está xa colocada sobre a ponte de Pedre, o punto desde o que o autocar caeu ao río e que desde que se iniciaron os traballos de rescate das vítimas foi o centro de operacións dos servizos de emerxencia.

Os técnicos deberán agora supervisar as probas de carga que se deberán facer para comprobar se o guindastre é capaz de soportar o peso do autobús, tendo en conta ademais que ao estar cheo de auga no seu interior, a súa tonelaxe aumentou exponencialmente.

Estes estudos incluirán tamén diversos tests para comprobar a resistencia da estrutura da propia ponte, que deberá soportar o peso do guindastre e do autobús, unha vez este sexa izado da auga, e o efecto da propia corrente do río.

Fontes da Subdelegación do Goberno confirmaron a Efe que, en todo caso, a posible extracción do autobús "aínda vai tardar", aínda que o obxectivo é tentalo hoxe mesmo. O izado do vehículo correspóndelle á empresa propietaria, Monbus, en coordinación con técnicos do Ministerio de Transportes e coas forzas e corpos de seguridade.

Non será unha operación sinxela, engaden estas mesmas fontes, porque ademais de preparar o guindastre e a ponte para o izado do vehículo, mergulladores do Grupo Especial de Actividades Subacuáticas (GEAS) da Garda Civil deberán somerxerse nas inmediacións do autobús.

Eles son os que deberán enganchar a pluma do guindastre ao eixe do autobús sinistrado que, unha vez asegurado, será izado moi lentamente para que a manobra non sexa demasiado brusca e acabe por desestabilizar as ancoraxes do guindastre que soportará todo o peso.

A retirada do autobús do río é unha peza clave na investigación para aclarar as causas do accidente xa que, entre outras cousas, permitirá acceder ao tacógrafo, o dispositivo que rexistra datos acerca da marcha e de determinadas actividades do condutor, de 63 anos e que o luns obtivo a alta médica.

Neste sinistro houbo sete vítimas mortais e dous sobreviventes. 

A investigación "levará semanas"

A investigación aberta para coñecer con exactitude as causas do accidente do autobús  levarán semanas. Así o avanzou esta mañá o delegado do Goberno, José Miñones, en declaracións aos xornalistas en Santiago de Compostela, e informou de que un grupo da Garda Civil especializado procedente de Mérida, onde se sitúa a Escola de Tráfico do instituto armado, levará a cabo a investigación do sinistro.

Sobre as causas do sinistro, o representante do Goberno nada puido adiantar, e afirmou que a investigación seguirá adiante coa toma de declaración ao condutor do autocar e á única sobrevivente do accidente, así como coa recuperación do tacógrafo do vehículo para saber se se poden extraer datos que acheguen información sobre o ocorrido.

"Mentres non teñamos avances desa investigación non poderemos dar ningunha información. Sabemos que as causas poden ser múltiples", dixo Miñones, que emprazou a deixar traballar á unidade especializada da Garda Civil de Tráfico, que levará a cabo a reconstrución do accidente.

Como dixo o delegado do Goberno, recompilar a información "levará tempo", e indicou que "ata as próximas semanas" non se terá toda a información para coñecer o acontecido.