Incáutanse de máis de tres millóns e medio de paquetes de tabaco de contrabando

A Garda Civil -coa colaboración de Europol, na denominada operación FATACA- desartellou unha organización criminal de contrabando de tabaco pola que se detiveron 27 persoas e se desmantelaron tres fábricas de tabaco, aprehendéronse 3.500.000 paquetes de tabaco sen precinto fiscal valoradas en 17.500.000 euros e 10.000 quilos de folla de tabaco, cun valor superior aos 20.000.000 de euros.

Na operación procedeuse a 24 entradas e rexistros en domicilios, naves industriais e comercios nas localidades de Sevilla, Málaga, Córdoba, Madrid, Albacete, Valencia, Zaragoza e A Rioxa.

A operación iniciouse a finais de 2021, cando estoupou a operación Turkeys, coa que se desmantelou unha fábrica clandestina de tabaco no interior dunha nave de pitos da localidade de Los Corrales en Sevilla.

Tras esta intervención, os axentes detectaron outra organización criminal que movía grandes cantidades de tabaco de contrabando, cun altísimo nivel de actividade en todo o territorio nacional e noutros países lindeiros. Por tal motivo, a Garda Civil solicitou a colaboración de Europol para coordinar a operación.

Sen precinto fiscal

A organización criminal tiña dous modus operandi claramente diferenciados, o que lles permitía aos seus líderes distribuír e abastecer de paquetes de tabaco sen precinto fiscal a todo o territorio nacional e a outros países europeos.

Importaban estes paquetes a través de contedores, introducidos por varios portos marítimos nacionais e mesmo internacionais. Este tabaco era introducido non declarando dita mercadoría ante as autoridades aduaneiras e por tanto eludían o pago dos correspondentes tributos (IIEE e IVE).

A organización para realizar as distintas tarefas de produción nas fábricas, valíanse de persoas de nacionalidade ucraína, que se trasladaron a España en situación irregular ou baixo protección internacional ante a guerra declarada no seu país. Vivían nas propias instalacións, en módulos prefabricados, e sen saír das instalacións para non ser detectados, realizaban longas xornadas de traballo. As condicións eran infrahumanas.

Os líderes da organización branqueaban grandes cantidades de diñeiro obtido a través do contrabando de tabaco, o que lles permitiría manter unha vida de luxos e residir en quintas con todo tipo de fastos en Sevilla ou en urbanizacións da localidade marbellí.

Na última etapa da operación, os investigadores detectaron como esta organización estaba a diversificar a súa actividade delituosa e ampliara as súas instalacións en macroplantacións de marihuana.

As tres fábricas clandestinas de tabaco estaban situadas nas localidades de Alfaro (A Rioxa), Los Corrales (Sevilla) e en Enquera (Valencia). As factorías contaban con maquinaria de avanzada tecnoloxía. O valor das fabricas estaría ao redor de de 3.000.000 de euros.

Ademais, incautáronse de maquinaria en Estepa (Sevilla), coa que a organización tiña previsto montar unha cuarta fábrica en Osuna (Sevilla), para aumentar aínda máis a produción e, por tanto, os beneficios. Coas tres fábricas que tiña a organización podería producir 540.000 paquetes ao día.

A investigación por branqueo de capitais permitiu o embargo de 7 inmobles e 25 vehículos, así como o bloqueo das contas bancarias das que eran titulares os investigados.