Investigan dous lugueses por atribuírse leiras alleas para cobrar axudas da PAC
Investigan dous lugueses por atribuírse leiras alleas para cobrar axudas da PAC
A Garda Civil cre que chegaron a cobrar uns 30.000 euros en subvencións ao incrementar a superficie que declaraban como propia das súas explotacións
![](https://img-g24-crtvg.flumotion.com/prog24/2024/20240213/barbecho.png)
A Garda Civil imputou un veciño de Guntín de 26 anos e a outro de Lugo de 73 anos como investigados polos delitos de estafa, fraude contra a facenda pública europea e usurpación de terreo rústico. Os dous son sospeitosos de atribuírse leiras doutros propietarios para cobrar axudas europeas, grazas ás cales lograron recadar uns 30.000 euros.
Segundo a información facilitada pola Garda Civil, ambos os investigados usaron “datos falsos nas declaracións” para solicitar axudas da Política Agraria Común (PAC), ao atribuírse o uso de varias leiras rústicas mediante arrendamento sen que os seus lexítimos propietarios tivesen coñecemento diso, unha circunstancia que mesmo chegou a provocar unha modificación da súa valoración catastral.
As citadas leiras, precisa a Comandancia de Lugo nun comunicado, están situadas nos termos municipais de Guntín e de Lugo.
As axudas recibidas, polo menos nos últimos cinco anos ían en función da superficie declarada, polo que supostamente incorporaron as citadas parcelas para obter unha maior subvención.
A investigación continúa aberta e foi remitida ao Xulgado de garda de Lugo.