Lazarus Technology busca información no móbil de Déborah

Os expertos da empresa de ciberseguridade Lazarus Technology buscaron por todo o mundo móbiles idénticos ao que tiña Déborah en 2002. Atopáronos en Singapur e Acerbaixán e xa traballan sobre eles.

O obxectivo é non danar o móbil da moza, que aínda está na Comisaría de Canillas, para extraer del a máxima información posible cando estea no seu poder. 

Curiosamente, o móbil, segundo a familia da moza, entregouse en man ao Comisario Galán, agora denunciado, e a policía chegou a dicir ata setembro que non se recibira.

A investigación segundo a familia tivo múltiples erros que benefician supostamente o exmozo, investigado formalmente desde febreiro do ano pasado.

Aínda que a Audiencia de Pontevedra recoñeceu que hai indicios para un xuízo oral, no último ano apenas houbo avances, algo que  exaspera a familia, que este abril se enfronta ao vixésimo primeiro aniversario da morte de Déborah.