Localizan os cadáveres dos empresarios Vicente Tarancón e Miguel Burdeos
Localizan os cadáveres dos empresarios Vicente Tarancón e Miguel Burdeos
Ambos os dous desapareceran tras o paso da DINA xunto a outros dous empresarios
O balance de vítimas mortais confirmadas polos asolagamentos ascende a 224
Na parte antiga de Paiporta a situación avanza con lentitude
Coches soterrados pola lama en Paiporta. EFE/Jorge Zapata
Os corpos sen vida dos empresarios Vicente Tarancón, propietario da firma de roupa deportiva Luanvi, e Miguel Burdeos, dono de Deliplus e Bosque Verde, foron recuperados este domingo polos servizos de rescate.
Desapareceran na tarde do 29 de outubro cando regresaban de Chiva en coche na compaña doutros dous empresarios: José Luis Marín, propietario dos colexios Mas Camarena, e Antonio Noblejas, exdirector xeral da escola de negocios EDEM.
A súa localización eleva a 224 o número de vítimas mortais confirmadas polo desastre, segundo a última actualización dos datos oficiais. A maioría pertence á Comunidade Valenciana (216) e o resto son de Castela-A Mancha (7) e de Andalucía (1).
Detencións
Desde que comezou a crise, as forzas e corpos de seguridade do Estado detiveron 343 persoas, 33 delas nas últimas horas, segundo os datos actualizados polo Goberno ás 12:00 horas deste domingo.
O número total de municipios afectados é de 78, dos cales 75 están en Valencia, dous en Castela-A Mancha e un en Andalucía.
O Goberno, a través das canles oficiais, publicou un resumo dos datos actualizados que radiografan a situación. Practicáronse 222 autopsias, identificáronse 195 corpos e rescatáronse 36.803 persoas, 82 nas últimas 24 horas.
