Logran calcular a traxectoria dun asteroide a partir do primeiro meteorito rexistrado en Galicia
Logran calcular a traxectoria dun asteroide a partir do primeiro meteorito rexistrado en Galicia
O astro, cuxo fragmento foi atopado no concello lugués de Baralla, provocou unha enorme bóla de lume visible na madrugada do 18 de xaneiro de 2021
O meteorito foi atopado en Traspena, Baralla
Varios equipos de investigadores da Universidade de Santiago de Compostela e do Centro Superior de Investigacións Científicas lograron calcular a traxectoria, o tamaño e a masa dun asteroide a partir dun meteorito de pouco máis de medio quilo, o primeiro rexistrado en Galicia.
Así, as pescudas lograron concluír que aquela enorme bóla de lume que na madrugada do 18 de xaneiro de 2021 cruzou durante case cinco segundos e iluminou o ceo do noroeste da penísula ibérica, era un asteroide de 1,15 metros de tamaño e 2,62 toneladas de masa, e que bateu contra a atmosfera a unha velocidade de 15 quilómetros por segundo.
O proceso e as conclusións serán publicadas nunha das revistas de astronomía máis prestixiosas do mundo. A publicación recolle os cálculos realizados polo astrónomo Manuel Andrade Baliño, que empregou novos métodos e modelos matemáticos.
Para facer o cálculo, empregáronse medidas obtidas coas cámaras de detección de bólidos e meteoros que a USC ten no Observatorio Astronómico Ramón María Aller, en Santiago de Compostela, e na Escola Politécnica Superior de Enxeñería de Lugo. Con todo, tamén foron cruciais as gravacións de particulares en diferentes lugares de Galicia e Castela e León.
Os cálculos realizados pola Escola de Enxeñería o mesmo día do avistamento xa indicaban que era "moi probable" que algún fragmento do asteroide sobrevivira preto do lugar de Lebruxo, no municipio lucense de Baralla. A continuación, organizouse un equipo formado polo profesorado do Departamento de Matemática Aplicada do Campus de Lugo. Finalmente foi un veciño de Lebruxo quen, dous meses despois, atopaba en Traspena o meteorito de 527 gramos.
