Loito en Oroso polo piloto falecido nunha exhibición aérea en Portugal

O accidente producíase á tardiña, no segundo día do festival aéreo que se celebraba na localidade portuguesa de Beja. Por causas que se investigan, dúas avionetas bateron no aire: unha conseguiu aterrar de emerxencia, pero a outra, a que pilotaba Manuel Rey, estrelouse e ardeu, segundo informou a Forza Aérea portuguesa.

Nada puideron facer por salvarlle a vida a Manuel, coñecido como Coco, un piloto con moita experiencia en voos acrobáticos e comerciais. 

"Coco era unha persoa con 18.000 horas de voo, comandante de Vueling, e xa traballara tamén con outras compañías", explica Fernando Beteta, compañeiro do falecido, e tamén piloto.

"Estaba considerado neste momento un dos mellores pilotos acrobáticos de Europa. Tiña unha experiencia impresionante, e facía unhas manobras tremendamente espectaculares", engade Beteta, que afirma que o accidente foi "un shock tremendo" e "inesperado".

Amigos e veciños manifestaron esa consternación en Oroso, onde residía dende hai anos o falecido, de orixe viguesa. Na súa memoria, dedicáronlle un minuto de silencio na praza do Concello. "É unha maneira de recoñecer esa desgraza que ocorreu -di o alcalde, Álex Doval- e dar o noso apoio á familia e os seres queridos desta persoa tan coñecida aquí".

Pésame ao que se sumaron múltiples condolencias a través das redes sociais. Institucións portuguesas e españolas, afeccionados, organizacións do sector da aviación e compañeiros do falecido manifestaron o seu pesar polo sinistro. Quixeron lembrar a longa traxectoria de Coco, e lembralo a el pilotando, a que era -din- a súa gran paixón. 

"Érao, sen dúbida" di seu amigo Beteta. "Lembrarémolo como gran persoa e gran piloto", conclúe.