Lugo contará cun cemiterio de mascotas con capacidade para 320 animais
Lugo contará cun cemiterio de mascotas con capacidade para 320 animais
Estará situado na contorna do actual cemiterio municipal e contará con bancos e árbores para crear un espazo íntimo no que recordar os animais falecidos
O Concello destinará 151.154 euros de orzamento para o proxecto
O tenente de alcaldesa do Concello de Lugo, Rubén Arroxo, anunciou que este mércores o Goberno local aprobará o inicio do procedemento para construír un cemiterio destinado a mascotas na contorna do actual cemiterio municipal, nunha parcela anexa duns 800 metros cadrados de extensión e con capacidade para 320 animais.
O novo espazo, explicou, será pechado perimetralmente, e a zona interior será axardinada e contará con bancos e elementos que permitan crear un espazo íntimo para o recordo dos animais falecidos.
Así mesmo, terá espazos para gardar as urnas dos animais incinerados, xunto a unha zona para gardar a chapa ou a cadea do animal.
Ademais, haberá zonas de sombra ao plantarse 19 árbores en toda a área. A edil de Participación, Cristina López, destacou que o Executivo municipal leva meses traballando neste servizo que, avanzou, "permitirá atender unha proposta que os veciños levan tempo reclamando".
A esta actuación, o Goberno local destinará 151.154 euros. Realizarase dando prioridade ao uso de materiais naturais e usará deseños respectuosos coa contorna.
