O BNG farase coa alcaldía de Ribeira tras catro décadas de gobernos populares
O BNG farase coa alcaldía de Ribeira tras catro décadas de gobernos populares
A remuda no concello do Barbanza prodúcese grazas ao acordo entre a formación nacionalista, o Partido Barbanza Independente (PBBI) e o PSdeG, que formarán parte dun goberno de coalición encabezado polo BNG
Luís Perez (Imaxe: BNG)
O candidato do BNG, Luís Pérez Barral, vaise converter este sábado no novo alcalde de Ribeira grazas ao apoio de Partido Barbanza Independente (PBBI) e o PSdeG, que formarán parte dun goberno de coalición encabezado polos nacionalistas.
O pacto alcanzado entre BNG, PBBI e PSdeG deuse a coñecer na mañá deste xoves, un día despois de que actual rexedor e aspirante á reelección, o popular Manuel Ruiz Rivas, anunciase o seu paso a un lado para formar parte da lista do PP ao Senado. O seu nome fora vetado polos independentes para un hipotético acordo cos populares, que quedaron a un edil da maioría absoluta nas eleccións locais do 28 de maio.
Así, Pérez Barral, de 33 anos, asumirá o bastón de mando do municipio barbancés na sesión constitutiva que terá lugar este sábado, na que se porá fin a case catro décadas de gobernos do PP para dar paso a un tripartito de BNG, PBBI e PSdeG, que obtiveron nas pasadas eleccións 5, 5 e 1 edil, respectivamente.
En declaracións a Europa Press, o próximo rexedor ribeirense mostrou a súa satisfacción pola fructificación dun acordo negociado "con moita discrección e moita calma" e que, nas súas propias palabras, permitirá pór en marcha "un goberno de progreso" en Ribeira.
Pérez Barral destacou que as "principais liñas" do pacto entre nacionalistas, independentes e socialistas son a aposta polos servizos públicos, avanzar na municipalización de servizos actualmente concesionados e acometer "melloras no mantemento e a limpeza" no concello.
Así as cousas, o acordo de goberno, ao que tivo acceso Europa Press, reparte as áreas de forma "equitativa" entre as tres formacións en función do seu peso na corporación froito do resultado das eleccións, onde o BNG foi segunda forza con algo menos de 200 votos por diante do PBBI, aínda que ambas as formacións lograron cinco edís; mentres que o PSdeG fíxose cun concelleiro.
Deste xeito, o próximo goberno de Ribeira dividirase en once áreas, tantas como actas de edil teñen as tres formacións que o conformarán. Cinco serán para o BNG (entre as que estarán Urbanismo, Cultura, Mobilidade, Promoción Económica e Obras); outras cinco para o PBBI (Servizos Sociais, Mar, Medio Rural ou Facenda, entre outras) e unha para os socialistas (Turismo, Festas e Relacións Institucionais).
Ademais de apoiar a investidura de Pérez Barral, que ostentará "todas as atribucións" como alcalde, independentes e PSdeG comprométense no seu acordo a actuar de forma conxunta na acción de goberno e a traballar de forma "consensuada", tamén á hora de valorar as iniciativas que leve a pleno a oposición, que quedará integrada de forma exclusiva polo PP con 10 edís nunha corporación de 21 asentos.
