Luis Rubiales queda en liberdade tras declarar ante a Garda Civil
Luis Rubiales queda en liberdade tras declarar ante a Garda Civil
O expresidente da Federación Española de Fútbol foi detido ao chegar a España procedente da República Dominicana
A xuíza bloquea máis de 50 contas a investigados e embarga un Mercedes a Rubiales
A Garda Civil deixou en liberdade o expresidente da Real Federación Española de Fútbol (RFEF) Luis Rubiales tras tomarlle declaración despois de ser detido nada máis aterrar no aeroporto Adolfo Suárez Madrid-Baraxas procedente da República Dominicana, informaron a EFE fontes próximas ao caso.
Segundo indicaron a EFE fontes próximas ao caso, os axentes da Unidade Central Operativa (UCO) do instituto armado conducírono a instalacións da Garda Civil no aeroporto, identificárono, incautáronlle os seus dispositivos móbiles e tomáronlle declaración, como pedira a xuíza que o investiga.
Agora será esta quen decida cando cita o expresidente da RFEF, a quen na República Dominicana os axentes lle incautaron dispositivos electrónicos e documentación no rexistro do seu aloxamento nese país.
Rubiales foi arrestado nada máis aterrar na terminal 1 do aeroporto, onde o esperaba unha furgoneta do instituto armado en que foi trasladado ata as dependencias da Garda Civil en Baraxas.
Luis Rubiales tiña previsto volver a España desde a República Dominicana este sábado, aínda que adiantou a este mércores o seu regreso a España precisamente un día despois de que axentes da UCO rexistraran a súa vivenda no país caribeño, onde residía desde hai uns meses.
Con todo, fontes da súa defensa indicaron que a súa vontade era volver canto antes e que aínda non ten ningunha citación no xulgado.
Desde o Goberno aseguran que a detención do expresidente da Federación Española de Fútbol demostra que o sistema xudicial funciona. O ministro Félix Bolaños desbota que prexudique a imaxe de España, sede o Mundial 2030.
Unha xuíza de Majadahonda (Madrid) investiga contratos, posiblemente irregulares, dos últimos cinco anos na RFEF, en coincidencia coa etapa de Rubiales á fronte da entidade. Mentres espera tomarlle declaración, a titular do xulgado bloqueou máis de medio cento de contas bancarias a diversos investigados, algunhas do expresidente federativo, a quen embargou un Mercedes.
Accedeu ao bloqueo destes produtos financeiros a pedimento da Garda Civil e co obxectivo de "garantir as posibles" responsabilidades económicas derivadas dos delitos que se imputan aos investigados, como administración desleal ou corrupción nos negocios.
No seu auto, do pasado 19 de marzo e ao que tivo acceso EFE, a maxistrada recoñece que non se cuantificaron "os prexuízos económicos" ou "o importe das presuntas comisións ilegais".
Con todo, apunta que ao longo da causa -que naceu para investigar o contrato para o traslado da Supercopa a Arabia Saudita- si se determinou "o importe da comisión percibida" por este contrato: 4 millóns de euros anuais "que se fai preciso asegurar".
Por iso, viu "imprescindible" embargar preventivamente unha serie de bens e bloquear produtos financeiros "en aras ao completo esclarecemento dos feitos".
Son en total 52 contas as que bloqueou a xuíza: tres de Luis Rubiales, outras tantas do seu amigo Francisco Javier Martín, Nene, -aínda que se bloquearon máis contas de sociedades vinculadas a el-; nove do seu exasesor xurídico Tomás González Cueto; e máis dunha decena do responsable de Gruconsa, Francisco Oliva Juárez.
Tamén embargou unha serie de bens, entre eles un Mercedes a Rubiales ou un Porsche a unha empresa administrada polo seu amigo Nene, e prohibe a varios investigados dispoñer de diversas propiedades.
Nese mesmo auto, a maxistrada solicita á Junta de Andalucía unha serie de convenios subscritos coa RFEF para a celebración de distintos encontros, como a Supercopa de España 2020/2021, así como o acordo do Consello de Goberno que autorizou unha subvención de 4,9 millóns de euros á sociedade Estadio de la Cartuja para financiar as obras para disputar partidos da UEFA EURO 2020.
Porque, ademais do contrato para o traslado da Supercopa a Arabia Saudita, a xuíza indaga noutras contratacións vinculadas á RFEF, como a que asignou á empresa Gruconsa as obras de remodelación do estadio da Cartuxa en Sevilla.
Os investigadores sospeitan que durante a época de Rubiales como presidente da RFEF asignáronse contratos a esta empresa "a cambio" de que realizase "pagos" á sociedade Dismatec, administrada polo seu amigo Nene e que presuntamente serviría como "instrumento para xestionar" o seu patrimonio familiar, segundo sospeita a Fiscalía.
Tamén detectaron que Gruconsa "estaría a planificar un macroproxecto en Arabia Saudita" de 400.000 metros cadrados para construír un estadio de fútbol, cidade deportiva e polo menos un hotel; un proxecto no que participaría Francisco Javier Martín e mostraría "especial interese" Rubiales, segundo extrae a Garda Civil das intervencións telefónicas.
Os axentes puxeron o foco nos negocios que tería Francisco Javier Martín na República Dominicana, país ao que comezou a viaxar con frecuencia Rubiales tras dimitir do seu cargo na RFEF, "e a acceder a capital social" de sociedades vinculadas ao seu amigo.
A Garda Civil constatou que Francisco Javier Martín estaría a utilizar un terceiro "para titular negocios" nese país e enviar diñeiro en efectivo, e descubriu que nun deses voos declarou a saída de 40.000 euros.
