Máis de 400 parellas participan no Máster de Futbolín de Rábade

Unha mestura de forza, habilidade, concentración e compenetración co compañeiro. Así definen o seu deporte os participantes nesta edición número 23 do Máster de futbolín de Rábade. Desta volta bateron todos os récords e son 400 as parellas participantes chegadas dende toda a xeografía española. A presenza de mulleres é cada vez máis habitual e xa hai competición feminina e mixta.

Despois de dous anos, xa había moitas ganas de volver sentir a adrenalina da competición e a afluencia foi masiva e coa presenza dos mellores xogadores de España. Dende a organización están moi satisfeitos coa participación e con poder contar cos grandes campións.

Con tal cantidade de xogadores semella que a competición vai estar reñida pero os grandes favoritos sinalan que poder volverse xuntar despois dos anos de pandemia xa é un triunfo. Con todo, resístense a explicar os seus segredos do xogo.

O Máster deu comezo onte e vaise prolongar ata o domingo. Os gañadores das distintas fases vanse repartir máis de 5.300 euros en premios.