Malpica segue recorrendo á auga embotellada

As restricións ao consumo de auga doméstico continuarán durante esta semana en Malpica, aínda que dende o Concello confían en que as analíticas resulten positivas e permitan recuperar a normalidade canto antes.

"Tiñámolo moi preto de dar ben, pero volveron dar mal e temos que seguir limpando e purgando, e facendo melloras na ETAP (Estación de Tratamento de Auga Potable)", afirma o alcalde de Malpica, Eduardo Parga.

Os residentes deste concello da Costa da Morte levan toda a semana pasada empregando auga embotellada para cociñar e beber despois de que a Consellería de Sanidade informara de que a auga non era apta para o consumo por mor dos altos niveis de trihalometanos.

Todo apunta a que a seca, e a maior concentración de materia orgánica no río, aumenta a presenza destes compostos químicos no proceso de potabilizacion, que en niveis altos poden resultar prexudiciais para a saúde.

"Temos que ter paciencia, porque o problema está en que o río non leva auga, e a materia orgánica que leva, ao clorar, produce isto. Non é nada que nos vaia matar, pero hai uns parámetros e Sanidade di que a partir daí non se debe ter o consumo humano", asegura o rexedor malpicán.

Dende que saltou a alarma, os veciños recorren á auga embotellada para o consumo, aínda que poden seguir utilizando a subministración doméstica para a hixiene persoal e outros usos.

O concello malpicán está a repartir garrafas de auga tanto na vila coma nas parroquias para o que habilitou un espazo na rede social Facebook onde se poden consultar as horas e as zonas de entrega dos recipientes. 

Dende a alcaldía informan que hoxe continuarán coas analíticas na auga e se nos vindeiros días obteñen resultados satisfactorios, procederán a eliminar as restricións ao consumo.