Mantense o aviso amarelo por neve en Navarra e Asturias

A neve obrigou a activar este domingo o aviso laranxa no Pireneo navarro e aragonés e o amarelo na montaña catalá e nos Picos de Europa.

O mal tempo vai remitindo despois dunha madrugada de neve, pedrazo e chuvia que mantivo activado o aviso laranxa e amarelo nas zonas de montaña do norte e centro peninsular e boa parte do Levante por mor do vento e do estado do mar. O tempo deixou numerosas incidencias en distintos puntos da rede viaria.

Un tren con 37 pasaxeiros a bordo descarrilou a primeira hora na localidade barcelonesa de Vacarisses, a consecuencia dun desprendemento de terras. Non deixou feridos.

Durante a tarde as estradas recuperaron a normalidade aínda que Tráfico aconsella extremar as precaucións nas provincias de Burgos, León e Segovia e naquelas vías secundarias de zonas de montaña. 

O aviso amarelo por neve só se se mantén en Navarra e Asturias, e Cataluña ten activo o nivel laranxa no litoral. Nas Baleares o temporal deixou chuvia e os cumes da Tramuntana amenceron cubertos de neve. Na costa os refachos de vento superaron os 100 quilómetros por hora polo que o aviso amarelo estivo activo durante todo o día. 

A outra cara do temporal de neve está nas estacións de esquí dos Pireneos que coas temperaturas baixas e estas últimas precipitacións contan con chegar a Semana Santa coas pistas abertas. En Baqueira Beret teñen 120 quilómetros esquiables e un metro de espesura.