A Consellería do Mar avisa de que a anulación do acordo Marrocos-UE afectará a frota galega ao necesitar máis cota Andalucía

A Consellería do Mar avisa de que a anulación do acordo pesqueiro entre Marrocos e a Unión Europea por parte do Tribunal de Xustiza da UE (TXUE) "terá os seus efectos" na frota galega ao verse afectada pola necesidade que terán os pesqueiros andaluces de máis cotas para paliar as perdas dese caladoiro, especialmente no caso de especies peláxicas.

Máis aló dos entre seis e dez barcos galegos que se poden ver afectados de forma directa por esta anulación do acordo pesqueiro, por parte da Consellería do Mar explícaselle a Europa Press que "tamén terá os seus efectos na frota galega" de forma "indirecta" polo "traslado do esforzo pesqueiro das frotas andaluzas cara ás cotas dispoñibles en España, o que supón que estas terminen sendo máis exiguas".

Neste sentido, a Consellería do Mar lamenta que a sentenza "supón unha perda de posibilidades de pesca" para a frota galega, polo que "se está realizando un seguimento detallado da evolución deste asunto".

O 4 de outubro, o Tribunal de Xustiza da UE tombou os acordos comerciais de agricultura e pesca entre a UE e o Reino de Marrocos por considerar que ambos se celebraron sen o consentimento do pobo do Sáhara Occidental.

Ademais, o Goberno galego fai fincapé en que a organización europea de armadores de pesca Europêche criticou esta sentenza por considerala "moi preocupante" para o sector ao reducírense as oportunidades pesqueiras.

Preto de 100 licenzas españolas

O alto tribunal europeo puxo fin así ao litixio sobre o acordo pesqueiro con Marrocos e o seu protocolo, ao desestimar os recursos do Consello e a Comisión, en liña coa sentenza do Tribunal Xeral da UE de 2021 e coas conclusións da avogada xeral, Tamara Cápeta.

A aplicación deste protocolo expirou o 17 de xullo de 2023, o que supuxo a suspensión da actividade, algo que afecta especialmente a España, xa que 92 das 138 licenzas que pescan na zona corresponden ao seu pavillón, en concreto, ás frotas andaluza, galega e canaria.

O sector pesqueiro español, representado pola Confederación Española de Pesca (Cepesca), advertiu de que esta decisión é un "novo golpe para o sector pesqueiro español", tanto o andaluz coma o canario e o galego. Pon o foco especialmente nos mariñeiros da provincia de Cádiz que pescan no golfo de Cádiz e que tiñan como complemento da súa actividade a posibilidade de ir a Marrocos a pescar especies como o bocarte, a sardiña ou o ollomol na modalidade de palangre de fondo.

Indicaba que o acordo de pesca entre a UE e Marrocos, que venceu o 17 de xullo de 2023, data en que os barcos europeos deixaron de pescar nesas augas, incluía a posibilidade de obter licenzas a un total de 138 barcos europeos dos cales 92 eran españois: 47 de Andalucía, 38 canarios e sete galegos, aínda que, no último protocolo, só se utilizaron ao redor dunha vintena por parte de empresas e pescadores das frotas andaluza, galega, vasca e canaria.

Desta forma, algúns dos buques afectados ao expirar o acordo con Marrocos o ano pasado, comezaron a pescar no golfo de Cádiz (andaluces) e en Mauritania (galegos) para paliar as consecuencias.