Mata unha menor a tiros en Toledo e fere de gravidade a súa parella, nai da moza

Un home foi detido por matar a tiros a filla da súa parella, menor de idade, e ferir gravemente a nai desta na localidade toledana de Otero, confirmou a Delegación do Goberno en Castela-A Mancha.

Disparou contra as dúas mulleres: a rapaza non sobreviviu e a nai cunha ferida de bala no peito resultou ferida de gravidade. Conforme as primeiras investigacións o home pretendía asasinar a  súa parella, pero descoñécese como se produciron os feitos. A muller estaba no sistema Viogén, de seguimento ás vítimas da violencia machista, por tres casos diferentes, ningún deles relacionados co home suposto autor dos disparos. Tiña na actualidade "unha orde de afastamento doutro home desde xuño deste mesmo ano".

A alcaldesa da localidade, Ana Isabel Labrado, sinalou que o suceso sucedeu contra as 6:40 horas deste sábado e ela mesma atendeu as vítimas. "Estaban a discutir na rúa e ao intre escoitamos tiros. Saímos e preguntámoslle: 'Juan, que pasa?', e despois vimos a nai pedindo axuda, cun tiro no peito", relatou.

Nese momento, segundo o relato da alcaldesa, comprobaron como a filla xacía sen vida cun disparo na fronte. O Servizo de Atención e Coordinación de Urxencias e Emerxencias 112 de Castela-A Mancha informou de que a chamada de aviso se rexistrou ás 7:00 horas deste sábado, na rúa Praza da localidade toledana, e que a falecida podería ter preto de 17 anos.

A nai, de 36 anos de idade, resultou ferida moi grave e foi estabilizada polo médico de urxencias e a UVI de urxencias. Finalmente foi trasladada ao Hospital 12 de Outubro de Madrid nun helicóptero medicalizado do Sescam. No operativo tamén participou a Garda Civil.

Este ano xa son nove menores as vítimas mortais da violencia vicaria machista; 62 desde que se rexistran datos, en 2013.  Desde xaneiro son 29 as mulleres asasinadas polas súas parellas ou exparellas.