Unha queima agrícola probable orixe do lume de Castelló que arrasa 3.000 hectáreas

O vento e as altas temperaturas complican a extinción do primeiro gran incendio forestal do ano. Segundo o servizo de Seguridade e Emerxencias da Generalitat a principal hipótese que se baralla é unha mala práctica durante unha queima agrícola. O lume que leva queimadas 3.000 hectáreas, orixinouse nun barranco con gran masa forestal e rodeado de bosques de alto valor ambiental.

Oito vilas foron desaloxadas, 1.500 veciños que tiveron que abandonar os seus domicilios, 106 pasaron a noite en albergues ou polideportivos habilitados para o efecto. Tamén desaloxaron unha residencia de anciáns e persoas de mobilidade reducida da localidade de Montán mediante autobuses e ambulancias.

Gran despregamento de medios de extinción

Un amplo dispositivo formado por efectivos terrestres e medios aéreos seguen traballando para tratar de frear o avance do lume no incendio forestal declarado onte no termo municipal de Villanueva de Viver, na zona limítrofe das provincias de Castelló e Teruel.

Hai 18 aeronaves e 400 persoas a traballar. Nas últimas horas despregáronse 10 unidades forestais, catro brigadas forestais, 11 autobombas e sete vehículos de apoio, ademais de dúas ambulancias e unidades complementarias dos servizos de urxencias sanitarias. 

De forma progresiva incorporanse ás tarefas de extinción catro helicópteros, tres avións, tres brigadas helitransportadas, 4 avionetas e efectivos da unidade Militar de emerxencias (UME), informaron fontes de Emerxencias da Generalitat.

O presidente do goberno Pedro Sánchez di que están seguindo moi de preto a evolución do incendio logo do empeoramento das condicións metorolóxicas na zona debido ao forte vento. Estamos ante o primeiro gran incendio da temporada.

O intenso fume complica os labores de extinción dun incendio cun perímetro moi amplo de arredor de 30 quilómetros que ameaza o parque natural de Serra de Espadán.

Asturias en alerta e con 22 incendios rexistrados

Mentres Asturias tamén está a sufrir as lapas con 22 incendios rexistrados polo Servizo de Emerxencias do Principado, tres menos que onte a noite.  Hai 78 concellos asturianos en risco alto, moi alto ou extremo por incendios forestais.

A Axencia Estatal de Meteoroloxía prevé nas próximas horas para Asturias algunhas choivas débiles e chuvascos, así como un descenso das temperaturas e ventos frouxos, o que podería axudar á extinción dos incendios.

O Plan de Incendios Forestais do Principado de Asturias está activado en fase de alerta, previa á emerxencia, desde o pasado 15 de xaneiro.