Morre un home ao saír da vía co seu vehículo en Viana do Bolo
Morre un home ao saír da vía co seu vehículo en Viana do Bolo
A vítima quedou atrapada no interior do coche logo de saír da vía e envorcar
Un home faleceu en Viana do Bolo ao saír da vía co vehículo en que viaxaba. Ocorreu na estrada OU-533, á altura do punto quilométrico 17.
Segundo informou o CIAE 112 Galicia, o suceso tivo lugar contra as 11:45 horas e foi preciso empregar o material de liberación para sacar a vítima mortal do interior do vehículo.
O 112 explicou que recibiu a alerta dun particular, que informaba de que o turismo estaba envorcado e cos ocupantes aínda no interior. Posteriormente, informou de que unha muller que viaxaba no vehículo puidera saír do mesmo, pero que o outro ocupante, un home, estaba atrapado.
De maneira inmediata pasouse aviso ao Servizo de Urxencias Sanitarias de Galicia-061, aos membros do GES da Gudiña, aos axentes da Garda Civil e da Policía Local e aos efectivos de Protección Civil da localidade.
Tras confirmar que o home que estaba atrapado no interior estaba falecido, os equipos de emerxencias procederon coas tarefas de liberación.
