Falece un veciño de Melón polas picadas de avespas velutinas
Falece un veciño de Melón polas picadas de avespas velutinas
Ocorreu na localidade do Coruxal e toda a veciñanza está moi preocupada pola presenza das avespas asiáticas
O home, de 71 anos, estaba trasladando o mel das súas colmeas cando sufriu o ataque dos insectos
Malia o esforzo dos equipos médicos non puideron salvarlle a vida
A poboación, a maioría de idade avanzada, está alarmada e pide que retiren polo menos cinco niños
No concello de Melón, na provincia de Ourense, faleceu este sábado un home de 71 anos tras sufrir a picadura de varias avespas velutinas.
Segundo os veciños que presenciaron o suceso, o veleno das avespas asiáticas foi fulminante, e malia que ata o lugar se trasladou o helicóptero medicalizado, non puideron facer nada por salvarlle a vida. A veciñanza está conmocionada e moi preocupada porque aseguran que na zona teñen polo menos cinco niños de velutinas.
"Hoxe morreu ese señor, e mañá vai ser o meu marido, porque está operado dun cancro de páncreas, é diabético e tiña a casa cheíña de velutinas", explica preocupada outra veciña.
O efecto do ataque dos insectos foi tan rápido que ninguén puido facer nada para evitar a morte do home de 71 anos, veciño da localidade do Coruxal, no concello ourensán de Melón.
"Estaban subindo os cacharros para arriba e cando o xenro subiu díxolle, acábanme de picar as velutinas, supostamente díxolle, imos ir ata o hospital, pero xa lle caeu diante dos pés" conta unha veciña do Coruxal.
O falecemento do seu veciño fixo aumentar a preocupación pola presenza na aldea da avespa asiática. Os veciños aseguran que hai xa tempo que deron os primeiros avisos ao servizo 012, habilitado para solicitar a retirada dos niños das velutinas pero por agora non os atenderon.
"Eu imaxino que están as cousas desbordadas, pero o que non pode suceder é que aquí haxa, que eu saiba neste momento, arredor de cinco niños. Hai máis de 15 días que se avisaron e non houbo ningunha resposta. Nós pedimos que atendan un pouco máis a zona rural", di Emilio Díaz, o alcalde de Melón.
"Estamos invadidos, isto non hai quen o aguante máis", afirma outra veciña do Coruxal.
A veciñanza está alarmada e piden a retirada dos niños das velutinas para evitar outra desgraza.
"Podíase evitar con algo máis de control ou polo menos respectando esas chamadas e eses aviso", apunta outro veciño da aldea.
"Primeiro son as velutinas que a xente da aldea? Non fan caso nin o Concello, nin a Xunta nin nada", responde moi enfadada a veciña que ten un niño de velutinas a carón da súa casa.
"Eu tamén son coma ese home, tamén son de risco e teño medo", di outro veciño de idade avanzada.
