Morre unha persoa ao envorcar o seu vehículo e caer ao río en Dumbría

Unha persoa morreu este domingo ao envorcar o coche que conducía e caer a un río nas proximidades do paseo fluvial de Dumbría. Ocorreu na estrada DP-3404, na parroquia de Olveiroa, sobre as seis da tarde.

A esa hora, unha persoa particular chamaba ao 112 Galicia para informar dun coche envorcado nun río e indicar, ademais, que non se podía acceder á zona e que descoñecía se había persoas no seu interior.

Ata o lugar desprazáronse efectivos da Garda Civil de Tráfico e os bombeiros de Cee, que conseguiron excarcerar a vítima, pero non puideron facer nada por salvarlle a vida. O vehículo estaba cheo de auga.