A policía multa un home en Vigo por trucar un patinete

Circulando a gran velocidade, conducindo bébedos, drogados, pola beirarrúa ou, coma neste caso, circulando nun patinete eléctrico trucado; a Policía Local de Vigo atopa todo tipo de irregularidades na condución destes vehículos, dos que os peóns tamén se decatan.

Desta vez, o condutor circulaba pola rúa Fisterra cando a policía local lle deu o alto. Ao inspeccionar o patinete para comprobar as súas características, detectaron que podía circular a 96 quilómetros por hora, cando non pode ir a máis de 25. 

Os axentes denunciaron o condutor por infrinxir o regulamento xeral de vehículos e incautáronse do patinete.